أتنين سمعهم تقيل واقفين علي محطة أتوبيس.. أتكلموا مع بعض شوية وياريتهم ما إتكلموا خالص ..
بيسو: الأتوبيس ده يروح مصر الجديدة؟
شوقي: علي الحديدة! ليه أنت طالب إحسان؟
بيسو: بذرة كتان.. تلاقيها عند العطار؟
شوقي: جزار.. أه قوللي كده.. عايز تشتري لحمة.
بيسو: معاك حق.. الدنيا زحمة.. ده معاد خروج الموظفين!
شوقي: حسنين.. لا والله ما أعرفوش!
بيسو: ما تشربوش.. ليه كفا الله الشر.
شوقي: راس البر.. ده مصيف هادي.
بيسو: تركب المعادي.. فعلا منطقة جميلة.
شوقي: بليلة.. أنت جعان.
بيسو: عيان.. باين عليك.. طب ما تروح لدكتور.
شوقي: حنطور.. أحسن من الأتوبيس بيوصلني لحد الباب.
بيسو: هباب.. وأنا اللي كنت فاكرك محترم؟
شوقي: إتخرم.. هو مين؟
بيسو: إسبرين.. أنت عندك صداع؟
شوقي: قراع.. يا نهار أبيض.. ده مرض خطير.
بيسو: فطير.. بس تقيل علي المعدة وغالي.
شوقي: خالي.. أنت تعرف خالي.. ده كبير في السن.
بيسو: جن.. نهارك مش فايت.. أنت عليك عفريت.
شوقي: لا والله.. مش معايا كبريت.. ليه ها تولع؟
بيسو: أدلع.. أدلع ليه يعني.. أنت أصلا ما تملاش عينيا!
شوقي: يقبضوا عليا.. ليه؟
بيسو: جنيه.. روح أشتغل شغلانة تاكل منها عيش.
شوقي: خيش! والله ده صوف إنجليزي.
بيسو: بنتك زيزي.. ربنا يخلي.
شوقي: إنتاج محلي.. ده مستورد.
*شوية.. وعدي شاويش.. سمعهم بيتكلموا.. سألهم:-
الشاويش: بتعمل إيه يا جدع منك له؟
الأتنين: أيوه يا شاويش.. مستنين الأتوبيس.
الشاويش: جواسين؟.. نهاركوا مش فايت.. قدامي علي القسم بسرعة.